Andainas dos pensamentos P 1

Pozo Barrento
3).-Andainas dos pensamentos  P 1

Nº 1

Que terá o mar revoltoso
nas súas inquedas entrañas,
que vomita a onda alba,
de caracol cimbrante,
sobre o leito virxe da praia?

O misterio está, quizais,
no seu máis alá.

Que esconderá no centro
do seu mariño intramar?
Soños de prata e azul
que son os espellos do sol.

Que terá o ruxir caprichoso,
son de inmusical compás,
que atormenta o silencioso
e doce son musical
da núa serea de mar?

Ronquido eterno,
expectante, medorento,
que leva a romper a onda
contra a gris praia serena
na súa ampla cama de area.

Que terá ese mar revoltoso,
que levanta espuma furiosa
cara a infinitos gozosos
de todo ser, de toda cousa?

Que terá na súa verdosa calma,
que seda a procura ansiosa
do tranquilo romper mariño
na preamar da miña alma,
na sorte do meu destino?

O misterio está, quizais,
no seu máis alá.